صورة السوبر ماركت الافتراضي اللي انتشرت على فيس بوك
معظمكم شاف البوست اللي على فيس بوك اللي بتتكلم عن الفيرتشوال ستور اللي في كوريا، حتى بالأمارة اللي كان منزلها كان كاتب تحت الصورة: "حموت من الحصرة على مصر"، بغض النظر إن "الحصرة" دي بتتفك في حتة تانية، ولنفترض إنه قصده على الحسرة، طيب يا جدعان ما أنا في كوريا ومشوفتش الشيء ده! وأكيد مش قصدهم على كوريا الشمالية لأن البلد دي هي الدليل الحي إن المخلوع كان معيشنا في أزهى عصور الديمقراطية بجد، يبقى أكيد في سول اللي أنا فيها دي، وكالعادة استشرت الأستاذ حسب الله جوجل، وقال لي هتلاقيها في محطة سولن.. سوجنـ.. سيليـ .. أصل الصراحة مبعرفش أنطق أسامي المحطات، بحفظ رقم المحطة، قال في محطة 220، عظيم الكلام ده، دي علي بعد أربع محطات مني.
صفوف البضاعة الافتراضية
رحت وقلبت المحطة لحد ما لقيته، وبدأت أفهم الموضوع، قال لك بتحمل أبلكيشن على التلفون، وبعدين الحاجة اللي بتكون عايزها بتصور البار كود بتاعها والأبلكيشن بتقراه وتبعته على النت للمحل الحقيقي اللي بالتالي بيبعت لك الحاجات على بيتكم، بس كدة، اللي خلاهم يفكروا في كدة هو الزحمة اللي في المترو ولأنه أكتر حاجة بيعدي فيها بني آدمين في اليوم، وفي نفس الوقت ماينفعش يحط
البضاعة نفسها علشان بتشغل مساحة كبيرة.
البضاعة نفسها علشان بتشغل مساحة كبيرة.
الشباشب الافتراضية
الطاسة الافتراضية!
الصراحة الصراحة، أنا شايف الفكرة سخيفة، ما هو طالما الموضوع كدة يبقى أمازون أو ما يشبهه يقدر يأدي الغرض - أمازون ده في يوم من الأيام كان نهر زي النيل كدة بس ربنا فتح عليه وبقى من أكبر المواقع في العالم - ، ويبدو إن الكوريين شايفين كدة برضو، فأنا فضلت واقف ربع ساعة على أمل إني ألاقي حد بيشتري ما لقيتش، وتقريبًا ما ينفعش يتعمل غير هنا وفي اليابان مثلا لأن معظم الشعبين دول معاهم سمارت فون على عكس باقي شعوب العالم. ولسخرية القدر المحل اللي جنبه كان فيه ناس كتير بتشتري وهو كان خاو تمامًا!
لاحظ الزحمة اللي على المحل اللي ورا على اليمين في حين الفيتشوال ستور بينش
تفتكروا لو صرغتمش كان عايش كان أيد فكرة الفيرتشوال ستور دي؟
انا برضه مفهمتش الفكرة و ليه الناس مبهورة بيها اوي كده بس قلت يمكن انا عشان بحب لا مؤاخذه افلي الحاجة قبل ما اشتريها فيمكن العقد من عندي انا!! كويس اني اكتشفت اني مش لوحدي :)
ReplyDeleteانا كمان موافقك يا تامر ... فعلا ملهاش لازمه على الاقل زى ما قالت ساره انك مش هتعرف تفلى الحاجه براحتك و تشوف افضل العروض.
ReplyDeleteفى امازون او غيره من المواقع اللى بتعمل شوبنج اون لاين بيكون فيه تفاصيل للمنتج الى جانب ان بيكون فيه ناس كتير بتعرض فبتعرف انهى افضل سعر و عرض. و الافضل من كل ده ان امازن زى مانت عارف فيه رفيوز من ناس تانيه اشترت نفس الحاجه من نفس البياع فاللى هو يعنى بتبقى كانك اشترتها بنفسك.